ပြည်ထောင်စုဝန်ကြီး ဒေါက်တာညွန့်ဖေ ငပုတောမြို့နယ် ဟိုင်းကြီးကျွန်းမြို့ အခြေခံပညာကျောင်းများ ကြည့်ရှုစစ်ဆေး

ပြည်ထောင်စုဝန်ကြီး ဒေါက်တာညွန့်ဖေ ငပုတောမြို့နယ် ဟိုင်းကြီးကျွန်းမြို့ အခြေခံပညာကျောင်းများ ကြည့်ရှုစစ်ဆေး

နေပြည်တော် နိုဝင်ဘာ ၇

ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာညွန့်ဖေသည် ဧရာဝတီတိုင်းဒေသကြီး လူမှုရေးဝန်ကြီး ဦးခင်မောင်ကြည်၊ တာဝန်ရှိသူများနှင့်အတူ ယနေ့နံနက်ပိုင်းတွင် ငပုတောမြို့နယ် ဟိုင်းကျွန်းကြီးမြို့ရှိ ကံချိုင်အခြေခံပညာအထက်တန်းကျောင်း၊ ဇီးချိုင်ရွာ အခြေခံပညာအထက်တန်းကျောင်း၊ ကျောက်ချောင်းအခြေခံပညာအထက်တန်းကျောင်း၊ ကညင်ချောင်း (တောင်) ကျေးရွာ အခြေခံပညာမူလတန်းကျောင်းနှင့် သဲကျင်းကျေးရွာ အခြေခံပညာမူလတန်းကျောင်းများသို့ သွားရောက်ကြည့်ရှုစစ်ဆေးသည်။

ကြည့်ရှုစစ်ဆေးစဉ် ဆရာ ဆရာမများကို ရင်းရင်းနှီးနှီးတွေ့ဆုံနှုတ်ဆက်ကာ ကျောင်းသား ကျောင်းသူများကိုပညာတတ်၍ ကိုယ်ကျင့်တရားကောင်းမွန်ပြီး မျိုးချစ်စိတ်၊ နိုင်ငံချစ်စိတ်ရှိသူများဖြစ်အောင် ပြုစုပျိုးထောင်သင်ကြားပေးကြစေလိုပါကြောင်း၊ ကျောင်းသား ကျောင်းသူများ တက်ရောက်ပညာသင်ကြားနေမှု အခြေအနေများ အဆင်ပြေချောမွေ့စေရေးနှင့် ကျောင်းသား ကျောင်းသူများ၏ ပညာသင်ယူမှုအခွင့်အလမ်း အပြည့်အဝရရှိစေရေးတို့ကို ဆရာ ဆရာမများအားလုံးက ဝိုင်းဝန်းလက်တွဲ ဆောင်ရွက်ပေးကြရမည်ဖြစ်ကြောင်း မှာကြားသည်။

မွန်းလွဲပိုင်းတွင် ပြည်ထောင်စုဝန်ကြီးသည် ကညင်ချောင်း (မြောက်) အခြေခံပညာအထက်တန်း ကျောင်း (ခွဲ)၊ ကုန်းတန်းအခြေခံပညာအထက်တန်းကျောင်း(ခွဲ)၊ စံထူး-စံပြ-အဏ္ဏဝါ အခြေခံပညာ အထက်တန်းကျောင်းနှင့် ဟိုင်းကြီးကျွန်းမြို့ အခြေခံပညာအထက်တန်းကျောင်းများသို့ သွားရောက်ကြည့်ရှုစစ်ဆေးသည်။

ယင်းနောက် ပြည်ထောင်စုဝန်ကြီးသည် စာသင်ခန်းအတွင်း အေးချမ်းပျော်ရွှင်စွာ ပညာသင်ကြား သင်ယူနေကြသည့် ကျောင်းသား ကျောင်းသူများကို ရင်းရင်းနှီးနှီးတွေ့ဆုံ၍ အချိန်ကိုတန်ဖိုးထား၍ ပညာကိုကြိုးစားသင်ကြားကြရန်၊ ပညာသင်ကြားရမည့်အရွယ်တွင် ပညာကိုစဉ်ဆက်မပြတ်ကြိုးစား သင်ယူကြရန်၊ ပညာသင်ကြားရာတွင် အတန်းပညာများကို အမှန်တကယ်တတ်မြောက်အောင် သင်ယူကြရန်နှင့် ငယ်စဉ်ကတည်းကကြိုးစား၍ လူတော်လူကောင်း အသိပညာရှင်၊ အတတ်ပညာရှင်များဖြစ်အောင် ကြိုးစားကြရမည်ဖြစ်ကြောင်း အားပေးစကားပြောကြားပြီး ဆရာ ဆရာမများ၏ တင်ပြချက်များကို ပေါင်းစပ်ညှိနှိုင်း ဖြည့်ဆည်းဆောင်ရွက်ပေးခဲ့ကြောင်း သိရသည်။

သတင်းစဉ်