မန္တလေးတိုင်းဒေသကြီး၊ သာစည်မြို့နယ်၌ ခရီးသည်တင်မော်တော်ယာဉ် တိမ်းမှောက်မှုဖြစ်ပွား၍ အမျိုးသား ၈ ဦးနှင့် အမျိုးသမီး ၁၄ ဦးတို့ ဒဏ်ရာရရှိ

     ၂၀၂၆ ခုနှစ်၊ ဖေဖော်ဝါရီ ၁၃ ရက်က မန္တလေးတိုင်းဒေသကြီး၊ သာစည်မြို့နယ်၌ ခရီးသည်တင် မော်တော်ယာဉ် တိမ်းမှောက်မှုဖြစ်ပွား၍ အမျိုးသား ၈ ဦးနှင့် အမျိုးသမီး ၁၄ ဦးတို့ ဒဏ်ရာရရှိခဲ့ကြောင်း သိရသည်။

     ဖြစ်စဉ်မှာ ဖေဖော်ဝါရီ ၁၃ ရက် မွန်းလွဲ ၂ နာရီ ၃၀ မိနစ်တွင် မန္တလေးတိုင်းဒေသကြီး၊ သာစည်မြို့နယ်၊ ကြပ်စခန်းကျေးရွာအနီး၊ မိတ္ထီလာ-တောင်ကြီးသွားကားလမ်း မိုင်တိုင်အမှတ် ၄၈ မိုင် ၁ ဖာလုံနှင့် ၂ ဖာလုံကြား၌ ယာဉ်တိမ်းမှောက်မှု ဖြစ်ပွားကြောင်း သတင်းအရ ယင်းမာပင်နယ်မြေ ရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ မိတ္ထီလာမြို့မှ တောင်ကြီးမြို့သို့ ဒဂုံမြို့သစ် (တောင်ပိုင်း)မြို့နယ်နေ ပြည့်ဖြိုးမင်း(၃၅)နှစ် မောင်းနှင်ပြီး ဘုရားဖူးခရီးသည် အမျိုးသား ၁၀ ဦး၊ အမျိုးသမီး ၁၇ ဦးတို့ လိုက်ပါလာသည့် YGN-22/2R-XXXX ZHONGTONG BUS Express ခရီးသည်တင် မော်တော်ယာဉ်သည် အခင်းဖြစ်နေရာအရောက်၌ အရှိန်မထိန်းနိုင်ဘဲ လမ်းယာဘက်ရှိ တောင်ကမ်းပါးယံအား ဝင်ရောက်တိုက်မိ တိမ်းမှောက်ခဲ့သောကြောင့် ယာဉ်ပေါ်လိုက်ပါလာသူ မရမ်းကုန်းမြို့နယ်နေ ဦးသောင်းကြည်(၅၆)နှစ်ပါ အမျိုးသား ၈ ဦးနှင့် လှိုင်သာယာမြို့နယ်နေ မသဲသဲလှိုင်(၂၈)နှစ်ပါ အမျိုးသမီး ၁၄ ဦးတို့တွင် ထိခိုက်ဒဏ်ရာများ အသီးသီးရရှိခဲ့သဖြင့် ပြည့်ဖြိုးမင်း အား ယင်းမာပင်နယ်မြေရဲစခန်း ယာဉ်(ပ)၂/၂၀၂၆၊ ရာဇသတ်ကြီးပုဒ်မ ၃၃၈/၃၃၇ ဖြင့် အမှုဖွင့် အရေးယူထားကြောင်း သတင်းရရှိပါသည်။