မြန်မာနိုင်ငံအမျိုးသားလူ့အခွင့်အရေးကော်မရှင်ရုံး လုပ်ငန်းခွင်ဝင်သင်တန်း (၁/၂၀၂၅) ဖွင့်လှစ်ခြင်း ( ရန်ကုန်၊ ၂၀၂၅ မတ် ၁၈ )

မြန်မာနိုင်ငံအမျိုးသားလူ့အခွင့်အရေးကော်မရှင်ရုံး လုပ်ငန်းခွင်ဝင်သင်တန်း (၁/၂၀၂၅) ဖွင့်လှစ်ခြင်း ( ရန်ကုန်၊ ၂၀၂၅ မတ် ၁၈ )

၁။   မြန်မာနိုင်ငံ အမျိုးသား လူ့အခွင့်အရေး ကော်မရှင်ရုံးတွင် လစ်လပ်လျက်ရှိသည့် ဦးစီးအရာရှိ၊ ဒုတိယလူ့အခွင့်အရေးဦးစီးမှူးနှင့် အငယ်တန်းစာရေးများအတွက် လုပ်ငန်းခွင်ဝင်သင်တန်း၊  (၁/၂၀၂၅)  သင်တန်းဖွင့်လှစ်ခြင်း အခမ်းအနားကို ၁၈-၃-၂၀၂၅ ရက်နေ့၊ ၁၀ နာရီအချိန် ကော်မရှင်ရုံး Conference Room ၌ ကျင်းပပြုလုပ်ခဲ့ပါသည်။ အခမ်းအနားသို့ ကော်မရှင်ဥက္ကဋ္ဌ၊ ကော်မရှင် အဖွဲ့ဝင်များ၊ ခေတ္တညွှန်ကြားရေးမှူးချုပ်၊ ညွှန်ကြားရေးမှူးများ၊ ကော်မရှင်ရုံး အရာထမ်းများနှင့် သင်တန်းသား အရာထမ်း/ အမှုထမ်းများ တက်ရောက်ကြပါသည်။

၂။    အခမ်းအနားတွင် မြန်မာနိုင်ငံ အမျိုးသား လူ့အခွင့်အရေး ကော်မရှင်၊ ကော်မရှင်ဥက္ကဋ္ဌ ဦးပေါ်လွင်စိန်က အဖွင့်အမှာစကားပြောကြားရာတွင် ကော်မရှင်ရုံးတွင် လစ်လပ်လျက်ရှိသည့် ဦးစီးအရာရှိ၊ ဒုတိယလူ့အခွင့်အရေးဦးစီးမှူး၊ အငယ်တန်းစာရေးရာထူးများတွင် ဖြည့်စွက်ခန့်အပ်ပြီး  ဝန်ထမ်းများအနေဖြင့် အလုပ်ခွင်ဝင်ရာတွင် တာဝန်များကို ချောမွေ့စွာ ထမ်းဆောင်နိုင်စေရန်အတွက်  ဤလုပ်ငန်းခွင်ဝင်သင်တန်းကို ဖွင့်လှစ်သင်ကြားပေးခြင်းဖြစ်ကြောင်း၊ ယခုသင်တန်းသည် ၂၀၂၅ ခုနှစ်၊ လုပ်ငန်းစီမံချက် ပန်းတိုင် (၇) တွင်ပါရှိသည့် ဝန်ထမ်းများ၏ စွမ်းဆောင်ရည် မြှင့်တင်ရေး၊ စွမ်းဆောင်ရည် ပြည့်ဝအောင် ဆောင်ရွက်ရေးဆိုသည့် ရည်မှန်းချက်ကို အကောင်အထည်ဖော်သည့် လုပ်ငန်းတစ်ခု ဖြစ်ပါကြောင်း၊ စီးပွားရေးလုပ်ငန်းဖြစ်စေ၊ ကုမ္ပဏီ လုပ်ငန်းဖြစ်စေ၊ ရုံးဌာနဆိုင်ရာလုပ်ငန်းဖြစ်စေ အလုပ်လုပ်သည့်နေရာတွင် လုပ်ငန်းစဉ်များ နည်းလမ်းမှန်ပြီး စနစ်တကျနှင့် အောင်မြင်အောင် ဆောင်ရွက်နိုင်ရေးတွင် အရေးကြီးပါကြောင်း၊ ရုံးဌာနဆိုင်ရာများတွင် ရုံးလုပ်ငန်းဆောင်ရွက်ရာ၌မှန်ကန်စေဖို့၊ စနစ်တကျနဲ့ မြန်မြန်ဆန်ဆန် ရှိစေရန်ရည်ရွယ်ပြီး ယခုလုပ်ငန်းခွင်ဝင်သင်တန်းမှာ ဆွေးနွေးပို့ချပေးကြမှာဖြစ်ကြောင်း၊ ရုံးလုပ်ငန်းဆောင်ရွက်ရာတွင် လုံခြုံမှုအဆင့် အတန်းအလိုက် သတ်မှတ်ထားခြင်းများရှိပြီး ဦးစားပေးအဆင့်အတန်းအလိုက် လုပ်ဆောင်ရသည်များကအစ အရေးယူဆောင်ရွက်ရသည့်စနစ်များ၊ စည်းကမ်းများရှိကြောင်း၊ ရုံးလုပ်ငန်းဟု သာမန်ပြောသည်မှာ လွယ်သော်လည်း တကယ် မှန်မှန်ကန်ကန် သိရှိနားလည်ထားရန်လိုကြောင်း၊ နားလည်မှုကိုလည်း လက်တွေ့လေ့ကျင့်မှသာ ကျွမ်းကျင်ကြောင်း၊ ကျွမ်းကျင်မှသာ လုပ်ငန်းများကို ထိထိရောက်ရောက် အောင်အောင်မြင်မြင် ဆောင်ရွက်နိုင်မှာဖြစ်ကြောင်း၊  ဒီနေ့ လုပ်ငန်းခွင်ဝင်သင်တန်းက ဝန်ထမ်းများ၏အရည်အသွေးကို မြင့်တက်စေမှာဖြစ်ကြောင်း၊  သင်ကြားပို့ချမည့် နည်းပြအရာရှိများအနေဖြင့်လည်း စေတနာထားပြီး အမှန်တကယ် နားလည်တတ်ကျွမ်းအောင် သင်ကြားပို့ချစေလိုကြောင်းနှင့် သင်တန်းသားများ အနေဖြင့်လည်း လေးလေးစားစား မှတ်သားနာယူစေလိုကြောင်းပြောကြားပါသည်။

၃။      လုပ်ငန်းခွင်ဝင်သင်တန်းသို့ သင်တန်းသား (၁၆) ဦး တက်ရောက်ပြီး သင်တန်းကာလမှာ   ၁၈-၃-၂၀၂၅ ရက်နေ့မှ ၂၂-၃-၂၀၂၅ ရက်နေ့အထိ (၅) ရက်ကြာ ဖွင့်လှစ်သွားမည်ဖြစ်ပါသည်။

မြန်မာနိုင်ငံအမျိုးသားလူ့အခွင့်အရေးကော်မရှင်