မွန်ပြည်နယ်၊ မုဒုံမြို့နယ်နှင့် ကျိုက်မရောမြို့နယ်တို့၌ လိုင်စင်မဲ့ မော်တော်ဆိုင်ကယ် လက်ဝယ်ထားစီးနင်းသူ အမျိုးသား နှစ်ဦးအား ဖမ်းဆီးအရေးယူ

မွန်ပြည်နယ်၊ မုဒုံမြို့နယ်နှင့် ကျိုက်မရောမြို့နယ်တို့၌ လိုင်စင်မဲ့ မော်တော်ဆိုင်ကယ် လက်ဝယ်ထားစီးနင်းသူ အမျိုးသား နှစ်ဦးအား ဖမ်းဆီးအရေးယူ

   ၂၀၂၅ ခုနှစ်၊ နိုဝင်ဘာ ၁၉ ရက်က မွန်ပြည်နယ်၊ မုဒုံမြို့နယ်နှင့် ကျိုက်မရောမြို့နယ်တို့၌ လိုင်စင်မဲ့ မော်တော်ဆိုင်ကယ် လက်ဝယ်ထားစီးနင်းသူ အမျိုးသား နှစ်ဦးအား ဖမ်းဆီးအရေးယူထားကြောင်း သိရသည်။

    ဖြစ်စဉ်မှာ နိုဝင်ဘာ ၁၉ ရက် နံနက် ၁၁ နာရီ ၃၀ မိနစ်တွင် မွန်ပြည်နယ်၊ မုဒုံမြို့နယ်၊ ကျုံဖိုက်ကျေးရွာရှိ ဘီးခွန်ကောက်ခံရေးဂိတ်၌ အမှတ်(၇၇)ယာဉ်ထိန်းရဲတပ်ဖွဲ့စုမှ တပ်ဖွဲ့ဝင်များက ယာဉ်စစ်ဆေးခြင်းများ ဆောင်ရွက်နေစဉ် မုဒုံမှ သံဖြူဇရပ်ဘက်သို့ ရေးမြို့နယ်၊ အဏ္ဏဝါရပ်ကွက်နေ ဇင်မင်းထွန်း(၄၆)နှစ် မောင်းနှင်လာသည့် မော်တော်ဆိုင်ကယ်အား ရပ်တန့်စစ်ဆေးခဲ့ရာ အဆိုပါ မော်တော်ဆိုင်ကယ်နှင့်ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ မော်တော်ဆိုင်ကယ်ဖြစ်ကြောင်း စစ်ဆေးတွေ့ရှိရသဖြင့် ဇင်မင်းထွန်း အား မုဒုံမြို့မရဲစခန်း (ပ)၁၆၅/၂၀၂၅၊ ပို့ကုန်သွင်းကုန်ဥပဒေပုဒ်မ ၈ ဖြင့် လည်းကောင်း။

   အလားတူ မွန်းလွဲ ၃ နာရီ ၃၀ မိနစ်တွင် ကျိုက်မရောမြို့နယ်၊ ရေတွင်းကုန်းကျေးရွာအနီး ကျိုက်မရော-မော်လမြိုင်သွားကားလမ်းပေါ်၌ ကျိုက်မရောမြို့မရဲစခန်းမှ တပ်ဖွဲ့ဝင်များက ယာဉ်စစ်ဆေးခြင်းများ ဆောင်ရွက်နေစဉ် မော်လမြိုင်မှ ကျိုက်မရောဘက်သို့ ရေတွင်းကုန်းကျေးရွာနေ ဌေးအောင်(၂၅)နှစ် မောင်းနှင်လာသည့် မော်တော်ဆိုင်ကယ်အား ရပ်တန့်စစ်ဆေးခဲ့ရာ အဆိုပါမော်တော်ဆိုင်ကယ်နှင့်ပတ်သက်သည့် အထောက်အထားတစ်စုံတစ်ရာ ပြသနိုင်ခြင်းမရှိဘဲ လိုင်စင်မဲ့ မော်တော်ဆိုင်ကယ်ဖြစ်ကြောင်း စစ်ဆေးတွေ့ရှိရသဖြင့် ဌေးအောင် အား ကျိုက်မရောမြို့မရဲစခန်း (ပ)၁၄၄/၂၀၂၅၊ ပို့ကုန်သွင်းကုန်ဥပဒေပုဒ်မ ၈ ဖြင့်လည်းကောင်း အသီးသီးအမှုဖွင့် အရေးယူထားကြောင်း သတင်းရရှိပါသည်။