ရှမ်းပြည်နယ်၊ ပင်လောင်းမြို့နယ်၌ ငွေကျပ် သိန်း ၄,၀၅၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိ

ရှမ်းပြည်နယ်၊ ပင်လောင်းမြို့နယ်၌ ငွေကျပ် သိန်း ၄,၀၅၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိ

   ၂၀၂၅ ခုနှစ်၊ နိုဝင်ဘာ ၁၇ ရက် မွန်းလွဲ ၁၂ နာရီ ၁၅ မိနစ်တွင် မူးယစ်ဆေးဝါးတားဆီး နှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် သတင်းအရ ရှမ်းပြည်နယ်၊ ပင်လောင်းမြို့နယ်၊ လိန်းလီကျေးရွာအနီး၌ နောင်ချိုမြို့နယ်၊ နောင်အောကျေးရွာနေ ခန့်ဝင်းဇော် (၂၂)နှစ် မောင်းနှင်ပြီး မန္တလေးတိုင်းဒေသကြီး၊ မဟာအောင်မြေမြို့နယ်နေ မျိုးမင်းထွန်း(၃၁)နှစ် လိုက်ပါလာသည့် FOTON အမျိုးအစား ခြောက်ဘီး မော်တော်ယာဉ်အား ရပ်တန့်စစ်ဆေးရှာဖွေခဲ့ရာ ယာဉ်ပေါ်မှ စိတ်ကြွရူးသွပ်ဆေးပြား ၈၁၀,၀၀၀ ပြား (တစ်ပြားလျှင် ငွေကျပ် ၅၀၀ နှုန်းဖြင့် ဒေသကာလတန်ဖိုး ငွေကျပ် ၄,၀၅၀ သိန်း) ဖမ်းဆီးရမိခဲ့ကြောင်း။

   ကွင်းဆက်အရ နိုဝင်ဘာ ၁၈ ရက် နံနက် ၈ နာရီ ၃၀ မိနစ်တွင် ဖမ်းဆီးရမိ စိတ်ကြွရူးသွပ် ဆေးပြားများအား သယ်ဆောင်ခိုင်းသူ မန္တလေးတိုင်းဒေသကြီး၊ မဟာအောင်မြေမြို့နယ်၊ စိန်ပန်းရပ်ကွက်နေ ရဲမင်းနိုင်(ခ)ရဲကြီး(၃၃)နှစ်အား ၎င်း၏နေအိမ်မှ ဖမ်းဆီးရမိခဲ့သဖြင့် ခန့်ဝင်းဇော်၊ မျိုးမင်းထွန်းနှင့် ရဲမင်းနိုင်(ခ)ရဲကြီးတို့ သုံးဦးအား မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေအရ အမှုဖွင့်အရေးယူထားကြောင်း သတင်းရရှိပါသည်။