ရှမ်းပြည်နယ်၊ မိုင်းယောင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား နှစ်ဦးနှင့် အမျိုးသမီး တစ်ဦး ထိခိုက်ဒဏ်ရာရရှိ

ရှမ်းပြည်နယ်၊ မိုင်းယောင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား နှစ်ဦးနှင့် အမျိုးသမီး တစ်ဦး ထိခိုက်ဒဏ်ရာရရှိ

     ၂၀၂၅ ခုနှစ်၊ ဇူလိုင် ၂၈ ရက်က ရှမ်းပြည်နယ်၊ မိုင်းယောင်းမြို့နယ်၌ ယာဉ်တိုက်မှုဖြစ်ပွား၍ အမျိုးသား နှစ်ဦးနှင့် အမျိုးသမီး တစ်ဦး ထိခိုက်ဒဏ်ရာရရှိခဲ့ကြောင်း သိရသည်။
     ဖြစ်စဉ်မှာ ဇူလိုင် ၂၈ ရက် ည ၁၁ နာရီ ၄၀ မိနစ်တွင် ရှမ်းပြည်နယ်၊ မိုင်းယောင်းမြို့နယ်၊ အမှတ်(၂)ရပ်ကွက်၊ ဗလမင်းထင်လမ်းမပေါ်၌ ယာဉ်တိုက်မှုဖြစ်ပွားကြောင်း သတင်းအရ မိုင်းယောင်းမြို့မရဲစခန်းမှ တပ်ဖွဲ့ဝင်များက သွားရောက်စစ်ဆေးခဲ့ရာ အမှတ်(၁)ရပ်ကွက်နေ လားငူ(၂၆)နှစ် မောင်းနှင်ပြီး ၎င်း၏ဇနီးဖြစ်သူ မဇာဇာမြင့်(၁၉)နှစ် လိုက်ပါလာသည့် H‌AOJUE အနီရောင်ဆိုင်ကယ်သည် အခင်းဖြစ်နေရာအရောက်၌ အရှိန်မထိန်းနိုင်ဘဲ တစ်ဖက်ယာဉ်ကြောသို့ရောက်ရှိကာ တစ်ရပ်ကွက်တည်းနေ ဦးစိုင်းအောင်ခမ်း(၃၇)နှစ် မောင်းနှင်လာသည့် HONDA DREAM အပြာရောင်ဆိုင်ကယ်အား မျက်နှာချင်းဆိုင် ဝင်ရောက်တိုက်မိခဲ့သဖြင့် ဦးစိုင်းအောင်ခမ်း၊ လားငူနှင့် မဇာဇာမြင့်တို့တွင် ထိခိုက်ဒဏ်ရာများ အသီးသီးရရှိခဲ့သောကြောင့် လားငူ အား မိုင်းယောင်းမြို့မရဲစခန်း ယာဉ်(ပ)၄/၂၀၂၅၊ ရာဇသတ်ကြီးပုဒ်မ ၃၃၈/၃၃၇/၂၇၉ ဖြင့် အမှုဖွင့်အရေးယူထားကြောင်း သတင်းရရှိပါသည်။