လူငယ်နှင့် နိုင်ငံရေးပျိုးထောင်မှု

လူငယ်နှင့် နိုင်ငံရေးပျိုးထောင်မှု

၂၀၂၅ ခုနှစ် ပါတီစုံဒီမိုကရေစီအထွေထွေရွေးကောက်ပွဲ အပိုင်း (၁) မဲပေးရာတွင် ပထမဆုံးအကြိမ်အဖြစ် မဲပေးကြသည့် လူငယ်များလည်း ပါဝင်သည်။ မီဒီယာက ရွေးကောက်ပွဲတွင် မဲပေးကြသည့် လူငယ်အချို့ကို တွေ့ဆုံမေးမြန်းရာတွင် ရွေးကောက်ပွဲမှတစ်ဆင့် နိုင်ငံအတွက် ခေါင်းဆောင်ကောင်းပေါ်ထွက်လာရေး၊ နိုင်ငံဖွံ့ဖြိုးတိုးတက်ရေး၊ လူငယ်များအတွက် အလုပ်အကိုင် အခွင့်အလမ်း၊ ကျန်းမာရေး၊ ပညာရေးတို့ကို ဖော်ဆောင်ပေးရေးနှင့် ကောင်းမွန်သည့် အနာဂတ်တို့ကို မျှော်လင့်ထားကြပြီး ရွေးကောက်ပွဲအပေါ် ယုံကြည်မှုအပြည့်အဝထားရှိကြသည်ကို တွေ့ရသည်။

နိုင်ငံတစ်နိုင်ငံ ဖွံ့ဖြိုးတိုးတက်ရေးတွင် နိုင်ငံသူ နိုင်ငံသားတို့၏ အတွေးအခေါ်အယူအဆများ၊ ဓလေ့ထုံးစံနှင့် အစဉ်အလာများက ဖွံ့ဖြိုးတိုးတက်မှုကို ဖော်ဆောင်ရာတွင် အထောက်အကူပြုရန်၊ လိုက်လျောညီထွေရှိရန်လိုသည်။ ဤသို့မဟုတ်ဘဲ ဆန့်ကျင်သည့်အခြေအနေတွင်ရှိနေပါက ပြုပြင်ပြောင်းလဲရန် ကြိုးပမ်းဆောင်ရွက်ကြရသည်။ အတွေးအခေါ်အယူအဆများနှင့် ဓလေ့ထုံးစံများဆိုသည်မှာ နိုင်ငံတစ်နိုင်ငံအတွင်း ရာစုနှစ်နှင့်ချီ၍ ဖွဲ့စည်းဖြစ်ပေါ်လာရခြင်းဖြစ်ရာ ယင်းတို့ကို ပြုပြင် ပြောင်းလဲမည်ဆိုပါက လူမှုရေး၊ နိုင်ငံရေးနည်းလမ်းများဖြင့် အချိန်ယူ၍ ပြုပြင်ကြရသည်။ ထို့အပြင် နိုင်ငံ၏အရေးအရာတို့တွင် ပြည်သူတို့ တက်ကြွစွာ ပါဝင်လိုစိတ်အားနည်းခြင်းနှင့် လူမှုရေးစည်းကမ်းထိန်းသိမ်းမှု အားနည်းခြင်းတို့မှာ ပြည်သူ တို့၏ နိုင်ငံရေးပျိုးထောင်မှု (Political Culture) အပေါ်တွင် တည်မှီလျက်ရှိသည်ဟု နိုင်ငံရေးသိပ္ပံပညာရှင်တို့က ဆိုသည်။

နိုင်ငံရေးပျိုးထောင်မှုဆိုသည်မှာ လူ့အဖွဲ့အစည်းတစ်ခုအတွင်းရှိ လူတို့၏ နိုင်ငံရေးဆိုင်ရာ သဘောထားနှင့် လက်တွေ့လုပ်ရပ်အစုအပေါင်းကို လွှမ်းခြုံခေါ်ဆိုခြင်းဖြစ်သည်။ နိုင်ငံရေး ပျိုးထောင်မှုသည် နိုင်ငံတစ်နိုင်ငံတွင် သမိုင်းနှင့်ယှဉ်၍ ဖွဲ့စည်းဖြစ်ပေါ်ခြင်းဖြစ်ပြီး မိမိတို့နိုင်ငံကဲ့သို့သော ကိုလိုနီနိုင်ငံဘဝ ကျရောက်ခဲ့ရဖူးသည့် ဖွံ့ဖြိုးဆဲနိုင်ငံများတွင် နိုင်ငံရေးပျိုးထောင်မှုမှာ ကိုလိုနီစနစ်၏ ဩဇာလွှမ်းမိုးမှုကို ခံကြရသည်။ နိုင်ငံဖွံ့ဖြိုးတိုးတက်ရေးအတွက် နိုင်ငံတည်ဆောက်ရေးသည် နိုင်ငံရေးပျိုးထောင်မှုအပေါ်တွင် တည်မှီလျက်ရှိရာ ဖွံ့ဖြိုးတိုးတက်ရေးကို ဖြစ်ပေါ်စေမည့် နိုင်ငံရေးအခြေအနေများရရှိအောင် ပြုလုပ်ကြရမည်ဖြစ်သည်။ သို့ဖြစ်ရာ နိုင်ငံသူနိုင်ငံသားများအတွင်း နိုင်ငံရေးပျိုးထောင်မှုကို လူငယ်ဘဝကပင် စတင်နိုင်ရန်လိုသည်။

ထို့အပြင် ဘဝနှင့် အလုပ်အပေါ်တွင် သဘောထားမမှန်ကန်ခြင်းနှင့် ဘဝတွင် ကြီးမားသော ရည်မှန်းချက်မထားတတ် ခြင်းတို့သည် ပျင်းရိခြင်း၊ ရောင့်ရဲတတ်ခြင်းနှင့် စွမ်းဆောင်လို စိတ်အားနည်းခြင်းတို့ကို ဖြစ်ပေါ်စေတတ်သည့်အတွက် လူငယ်များကို ဘဝနှင့် အလုပ်အပေါ်တွင် သဘောထားမှန်ကန်စွာ ထားတတ်စေရန်၊ ဘဝတွင် ကြီးမားသည့် ရည်မှန်းချက်ပန်းတိုင် ထားတတ်ကြရန်လည်း လေ့ကျင့်ပျိုးထောင်ပေးသွားရန်လိုသည်။ လူ့ဘဝတွင် အသက်ရှင်ရပ်တည်နေရုံထက် ပို၍ မည်သည့်မြင့်မားသော ရည်မှန်းချက်မျှ မထားရှိပါက စွမ်းဆောင်လိုစိတ်အားနည်းခြင်းနှင့် အပြောင်းအလဲကို စိတ်မဝင်စားခြင်းတို့ ဖြစ်ပေါ်စေသည်။ အချို့သော ရှေးရိုးအစဉ်အလာအစွဲအလမ်းများ၊ ဓလေ့ထုံးတမ်းများနှင့် အကောက်အယူလွဲမှားမှုများက ဖွံ့ဖြိုးတိုးတက်ရန် ကြိုးပမ်းမှုများကို တားဆီးပိတ်ပင်တတ်သည့်သဘောရှိရာ ပြုပြင်ပြောင်းလဲရန် သို့မဟုတ် စွန့်ပယ်ရန် ဆောင်ရွက်ကြရမည်ဖြစ်သည်။

မိမိတို့နိုင်ငံတွင် အသက် ၁၅ နှစ်မှ ၃၅ နှစ်အတွင်းရှိ လူငယ်ဦးရေမှာ နိုင်ငံ့လူဦးရေ၏ သုံးပုံတစ်ပုံခန့်ရှိနေသည်။ ၂၀၂၁ ခုနှစ် နိုင်ငံရေးအပြောင်းအလဲနှင့် ဆက်စပ်၍ နိုင်ငံရေးသမားတို့၏ ဝါဒမှိုင်းတိုက် သွေးထိုးလှုံ့ဆော်အသုံးချမှုတွင် လမ်းမှားလိုက်သွားသည့်လူငယ်များ အများအပြားရှိရာ ၎င်းတို့မှာ နိုင်ငံအတွက် အနုတ်လက္ခဏာကိုသာ ဖြစ်ပေါ်စေသည်။ နိုင်ငံ၏အနာဂတ်ကို ကောင်းမွန်အောင် တည်ဆောက်ရာတွင် စိတ်ဓာတ်မြင့်မားသူ၊ အတွေးအခေါ်မှန်ကန်သူ၊ ရိုးသားဖြောင့်မတ်သူ၊ စွမ်းရည်ပြည့်စုံသူ လူငယ်များ၏အားကို လိုအပ်သည့်အလျောက် ကာယ၊ ဉာဏ၊ စာရိတ္တ၊ မိတ္တ၊ ဘောဂ ဗလငါးတန်နှင့် ပြည့်စုံအောင် စနစ်တကျ မှန်မှန်ကန်ကန် လေ့ကျင့်ပျိုးထောင်သွားကြရပါမည့်အကြောင်း။ ။