အမျိုးသမီးများ ဖွံ့ဖြိုးတိုးတက်ရေးဆိုင်ရာ နိုင်ငံတော်အဆင့် မဟာဗျူဟာစီမံကိန်း (၂၀၂၃-၂၀၃၂) အသိပညာပေးအစီအစဉ်ကျင်းပ

အမျိုးသမီးများ ဖွံ့ဖြိုးတိုးတက်ရေးဆိုင်ရာ နိုင်ငံတော်အဆင့် မဟာဗျူဟာစီမံကိန်း (၂၀၂၃-၂၀၃၂) အသိပညာပေးအစီအစဉ်ကျင်းပ

နေပြည်တော် မတ် ၂၅

အမျိုးသမီးများ ဖွံ့ဖြိုးတိုးတက်ရေးဆိုင်ရာ နိုင်ငံတော်အဆင့် မဟာဗျူဟာစီမံကိန်း- NSPAW (၂၀၂၃-၂၀၃၂) အသိပညာပေးအစီအစဉ်ကို ယနေ့မွန်းလွဲပိုင်းတွင် နေပြည်တော်ရှိ Hotel Max ၌ ကျင်းပသည်။

တက်ရောက်

အဆိုပါ အသိပညာပေးအစီအစဉ်သို့ အမျိုးသမီးများ ဖွံ့ဖြိုးတိုးတက်ရေးဆိုင်ရာ နိုင်ငံတော်အဆင့် မဟာဗျူဟာစီမံကိန်း (၂၀၂၃-၂၀၃၂) ရေးဆွဲရေးဆိုင်ရာ ဦးဆောင်ကော်မတီဥက္ကဋ္ဌ လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာ စိုးဝင်း၊ ဒုတိယဥက္ကဋ္ဌများဖြစ်ကြသည့် နယ်စပ်ရေးရာဝန်ကြီးဌာနနှင့် လူမှုဝန်ထမ်း၊ ကယ်ဆယ်ရေးနှင့်ပြန်လည်နေရာချထားရေးဝန်ကြီးဌာနတို့မှ ဒုတိယဝန်ကြီးများ၊ ဦးဆောင်ကော်မတီအဖွဲ့ဝင် ဒုတိယဝန်ကြီးများ၊ လုပ်ငန်းကော်မတီဝင်များ၊ သက်ဆိုင်ရာဌာနများမှ တာဝန်ရှိသူများ၊ အမျိုးသမီးအဖွဲ့များမှ ကိုယ်စားလှယ်များ တက်ရောက်ကြသည်။

ဦးစွာ ပြည်ထောင်စုဝန်ကြီးက အမျိုးသမီးများ ဖွံ့ဖြိုးတိုးတက်ရေးဆိုင်ရာ နိုင်ငံတော်အဆင့် မဟာဗျူဟာစီမံကိန်း- NSPAW (၂၀၂၃-၂၀၃၂)ကို ကျယ်ကျယ်ပြန့်ပြန့်သိရှိပြီး ပူးပေါင်းဆောင်ရွက်လာစေရန်အတွက် သက်ဆိုင်ရာဝန်ကြီးဌာနများကိုသာမက တိုင်းဒေသကြီး/ ပြည်နယ်များကိုပါ အသိပညာပေးဆောင်ရွက်မည်ဖြစ်ကြောင်း။

နိုင်ငံတော်အဆင့် မဟာဗျူဟာစီမံကိန်းသည် နိုင်ငံတကာနှင့် ဒေသတွင်းမျက်နှာစာတွင် မိမိတို့နိုင်ငံ၏ အမျိုးသမီးကဏ္ဍမြှင့်တင်မှုကို ပေါ်လွင်ထင်ရှားအောင် ပြသနိုင်မည့် ပြယုဂ်တစ်ခုအနေဖြင့် မှတ်တမ်းတင်နိုင်မည်ဖြစ်ကြောင်း၊ ထို့ကြောင့် စီမံချက်ပါရည်မှန်းချက်များ ပြည့်မီရန် အားလုံးဝိုင်းဝန်းအကောင်အထည်ဖော်ဆောင်ရွက်ပေးကြရန် တိုက်တွန်းပြောကြားသည်။

ရှင်းလင်းတင်ပြ

ထို့နောက် လူမှုဝန်ထမ်းဦးစီးဌာန ညွှန်ကြားရေးမှူးချုပ်က အမျိုးသမီးများ ဖွံ့ဖြိုးတိုးတက်ရေးဆိုင်ရာ နိုင်ငံတော်အဆင့် မဟာဗျူဟာစီမံကိန်း-NSPAW (၂၀၂၃-၂၀၃၂) ရေးဆွဲထားရှိမှုလုပ်ငန်းစဉ်နှင့် စီမံကိန်းအကောင်အထည်ဖော်မှု အထောက်အပံ့ဖြစ်စေရေး ကျား၊ မ ရေးရာ တာဝန်ခံ Gender Focal Point များ၏ အခန်းကဏ္ဍနှင့် စပ်လျဉ်း၍ ရှင်းလင်းတင်ပြသည်။

ယင်းနောက် လုပ်ငန်းကော်မတီဝင်များက သက်ဆိုင်ရာလုပ်ငန်းနယ်ပယ်အလိုက် စီမံကိန်းပါလုပ်ငန်းစဉ်များ အကောင်အထည်ဖော်မှုနှင့်ပတ်သက်၍ ဆောင်ရွက်ထားရှိမှုများ ရှင်းလင်းတင်ပြကြပြီး နိုင်ငံတော်အဆင့် မဟာဗျူဟာစီမံကိန်း NSPAW (၂၀၂၃-၂၀၃၂) စာအုပ်ကို ဖြန့်ချိသည့် အစီအစဉ်အား ဆောင်ရွက်ခဲ့ကြကြောင်း သိရသည်။

သတင်းစဉ်