“စိန်ရတု မြန်မာ - တရုတ် ချစ်ကြည်ရေး” တေးဂီတဖျော်ဖြေပွဲ ကျင်းပ

“စိန်ရတု မြန်မာ - တရုတ် ချစ်ကြည်ရေး” တေးဂီတဖျော်ဖြေပွဲ ကျင်းပ

ရန်ကုန် ဇွန် ၁၃

မြန်မာ-တရုတ် နှစ်နိုင်ငံသံတမန်ဆက်ဆံရေးထူထောင်မှု (၇၅) နှစ်ပြည့်မြောက်မှု ဂုဏ်ပြုအစီအစဉ်အဖြစ် “စိန်ရတု မြန်မာ-တရုတ် ချစ်ကြည်ရေးတေးဂီတဖျော်ဖြေပွဲ”ကို ယနေ့ညပိုင်းတွင် ရန်ကုန်မြို့ ပြည်လမ်းရှိ မြန်မာ့အသံနှင့်ရုပ်မြင်သံကြားတွင် စီစဉ်ကျင်းပသည်။

အဆိုပါ တေးဂီတဖျော်ဖြေပွဲသို့ ပြန်ကြားရေးဝန်ကြီးဌာန ပြည်ထောင်စုဝန်ကြီး ဦးမောင်မောင်အုန်း၊ ရန်ကုန်တိုင်းဒေသကြီးဝန်ကြီးချုပ် ဦးစိုးသိန်းနှင့် တိုင်း​ဒေသကြီးဝန်ကြီးများ၊ မြန်မာနိုင်ငံဆိုင်ရာ တရုတ်သံအမတ်ကြီး မစ္စမာကျားနှင့် သံရုံးဝန်ထမ်းများ၊ မြန်မာနိုင်ငံ သတင်းမီဒီယာကောင်စီ၊ ရုပ်ရှင်၊ သဘင်၊ ဂီတနှင့် ဟာသအစည်းအရုံးတို့မှ တာဝန်ရှိသူများ၊ အနုပညာရှင်များ၊ တရုတ်-မြန်မာ ချစ်ကြည်ရေးအသင်း၊ တရုတ်-မြန်မာ ကုန်သည်ကြီးများအသင်းချုပ်၊ မြန်မာနိုင်ငံ တရုတ်စက်မှုလက်မှုလုပ်ငန်းရှင်များအသင်း၊ တရုတ်နိုင်ငံမှ လာရောက်လုပ်ကိုင်နေကြသည့် စီးပွားရေးကုမ္ပဏီများ၊ သီးခြားဖိတ်ကြားထားသည့် ဧည့်သည်တော်များ၊ ရန်ကုန်နိုင်ငံခြားဘာသာတက္ကသိုလ်မှ ကျောင်းသား ကျောင်းသူများ၊ ရန်ကုန်တိုင်းဒေသကြီး လူငယ်စင်တာမှ လူငယ်များနှင့် ရန်ကုန်မြို့ရှိ တရုတ်သတင်းအေဂျင်စီများ တက်ရောက်ကြည့်ရှုအားပေးကြသည်။

ဦးစွာ မြန်မာ့အသံနှင့်ရုပ်မြင်သံကြားမှ မြန်မာ့ဆိုင်းဝိုင်းကြီးက ရေကင်းတီးလုံးဖြင့် ဖျော်ဖြေတင်ဆက်သည်။

ဆက်လက်၍ မြန်မာ့အသံနှင့်ရုပ်မြင်သံကြားမှ မြန်မာ့ဆိုင်းဝိုင်းကြီး၊ သံစုံတီးဝိုင်းနှင့် ခေတ်ပေါ်တေးဂီတအဖွဲ့တို့၏ တီးခတ်မှုနှင့်အတူ MRTV နှင့် ပြင်ပတေးသံရှင်စုစုပေါင်း ၁၁ ဦးတို့က မြန်မာ- တရုတ်နှစ်ဘာသာဖြင့် တေးသီချင်းများကို တေးသရုပ်ဖော်အကများနှင့် တွဲဖက်၍ သီဆိုဖျော်ဖြေတင်ဆက်ကြသည်။

ထို့နောက် မြန်မာနိုင်ငံ တရုတ်စက်မှုလက်မှုလုပ်ငန်းရှင်များအသင်း (CECCM) မှ ဥက္ကဋ္ဌ Mr. Liu Ming က ငလျင်ဘေးဒဏ်ထိခိုက်ခံခဲ့ရသည့် ပြန်ကြားရေးဝန်ကြီးဌာနမှ ပြန်လည်တည်ဆောက်ရေးလုပ်ငန်း များအတွက် ဘိလပ်မြေအိတ် ၁၅၀၀ ကို လှူဒါန်းရာ ပြည်ထောင်စုဝန်ကြီး ဦးမောင်မောင်အုန်းက လက်ခံရယူသည်။

ယင်းနောက် တေးဂီတဖျော်ဖြေပွဲတွင် ဖျော်ဖြေတင်ဆက်ခဲ့ကြသည့် အနုပညာရှင်များအား ပြည်ထောင်စုဝန်ကြီး ဦးမောင်မောင်အုန်းနှင့် သံအမတ်ကြီး မစ္စမာကျားတို့က ဂုဏ်ပြုပန်းခြင်း ပေးအပ်သည်။

အဆိုပါ စိန်ရတု မြန်မာ-တရုတ် ချစ်ကြည်ရေးတေးဂီတဖျော်ဖြေပွဲတွင် နာမည်ကြီး မြန်မာ၊ တရုတ် တေးသီချင်းကောင်းများကို ရွေးချယ်ပြီး ဖျော်ဖြေတင်ဆက်ကြရာ ပရိသတ်များကလည်း လိုက်ပါ၍ သံပြိုင်သီဆိုအားပေးကြသကဲ့သို့ MRTV မှလည်း တိုက်ရိုက် (Live) ထုတ်လွှင့်ပြသခြင်းဖြင့် နှစ်နိုင်ငံဆက်ဆံရေးနှင့် ချစ်ကြည်ရေးခိုင်မြဲမှုကို ပိုမိုရင်းနှီးနွေးထွေးမှုဖြစ်စေပြီး မြှင့်တင်နိုင်ခဲ့ကြောင်း သိရသည်။

သတင်းစဉ်