ကရင်ပြည်နယ်၊ မြဝတီမြို့နယ်၊ အမှတ်(၄)ရပ်ကွက်၌ ဟိုတယ် မီးလောင်မှု

ကရင်ပြည်နယ်၊ မြဝတီမြို့နယ်၊ အမှတ်(၄)ရပ်ကွက်၌ ဟိုတယ် မီးလောင်မှု

   ၂၀၂၅ ခုနှစ်၊ နိုဝင်ဘာ ၁၆ ရက် မွန်းလွဲ ၁ နာရီ ၅၀ မိနစ်ခန့်က ကရင်ပြည်နယ်၊ မြဝတီမြို့နယ်၊ အမှတ်(၄)ရပ်ကွက်၌ ထိပ်တန်းဟိုတယ် ပိုင်ရှင် ဒေါ်ခင်ကြူတာ၏ အလျား ၄၀ ပေ၊ အနံ ၁၂၀ ပေ၊ RC ခြောက်ထပ်၏ မြေညီထပ်ရှိ ပစ္စည်းထားသည့်အခန်းအနီးတွင် ဝရိန်ဆော်ရာမှ အနီးရှိ ဖော့များအပေါ် မီးပွားကျပြီး မီးစတင်ကူးစက်လောင်ကျွမ်းမှု ဖြစ်ပွားကြောင်း သတင်း ရရှိသဖြင့် မြဝတီခရိုင်၊ မြို့နယ်မီးသတ်စခန်းများမှ မီးသတ်တပ်ဖွဲ့ဝင်များသည် မီးသတ်ယာဉ် လေးစီးဖြင့် မီးငြှိမ်းသတ်ခဲ့ရာ မွန်းလွဲ ၃ နာရီတွင် မီးငြိမ်းခဲ့ပါသည်။

   အဆိုပါမီးလောင်မှုကြောင့် ဟိုတယ်မြေညီထပ်ရှိ ပစ္စည်းများထားသည့်အခန်း၌ အလုပ်နား၍ အိပ်နေသည့် အလုပ်သမား ဦးသန့်ဇော်(၅၃)နှစ်နှင့် ဒေါ်လဲ့လဲ့စန်း(၄၂)နှစ်တို့ နှစ်ဦးမှာ မီးခိုးမွန်းကြပ် သေဆုံးခဲ့ကြောင်း၊ ဝရိန်ဆော်သူ ကိုမင်းသော်တာအောင်(၂၃)နှစ် မီးလောင်ဒဏ်ရာ(မစိုးရိမ်ရ)အား မြဝတီခရိုင်ပြည်သူ့ဆေးရုံသို့ ပို့ဆောင်ပေးခဲ့ကြောင်း၊ ၎င်းအခန်းအတွင်းရှိ အခန်းဖွဲ့ နံရံကပ်ဖော့ပြားများ၊ ဆိုဖာခုံများ မီးလောင်ဆုံးရှုံးခဲ့ကြောင်းနှင့် မီးပေါ့ဆစွာ အသုံးပြုသူ မင်းသော်တာအောင် အား မြဝတီမြို့မရဲစခန်းမှ အမှုဖွင့်အရေးယူထားကြောင်း သတင်းရရှိပါသည်။