ရန်ကုန်တိုင်းဒေသကြီး၊ အင်းစိန်မြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံး

ရန်ကုန်တိုင်းဒေသကြီး၊ အင်းစိန်မြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံး

    ၂၀၂၆ ခုနှစ်၊ မေ ၂၆ ရက်က ရန်ကုန်တိုင်းဒေသကြီး၊ အင်းစိန်မြို့နယ်၌ ယာဉ်တိုက်မှုဖြစ်ပွား၍ အမျိုးသား တစ်ဦး သေဆုံးခဲ့ကြောင်း သိရသည်။

  ဖြစ်စဉ်မှာ မေ ၂၆ ရက် နံနက် ၆ နာရီ ၃၀ မိနစ်တွင် ရန်ကုန်တိုင်းဒေသကြီး၊ အင်းစိန် မြို့နယ်၊ ဒညင်းကုန်းဈေးဝင်ပေါက်ဂိတ်အနီး၌ ယာဉ်တိုက်မှုဖြစ်ပွားကြောင်း သတင်းအရ အမှတ်(၉)ယာဉ်ထိန်းရဲဒုတပ်ဖွဲ့ခွဲမှ တပ်ဖွဲ့ဝင်များက သွားရောက်စစ်ဆေးခဲ့ရာ ရွှေပြည်သာလမ်းအတိုင်း အရှေ့မှ အနောက်သို့ လှိုင်မြို့နယ်၊ အမှတ်(၁၃)ရပ်ကွက်နေ ဦးတင်မျိုးအောင်(၄၆)နှစ် မောင်းနှင်လာသော MDY-13/7D-XXXX SCANIA ၂၂ ဘီးယာဉ်သည် အခင်းဖြစ်နေရာအရောက်၌ လားရာတူ ဝဲဘက် ဘေးတွင် စက်ဘီးစီးနင်းနေသည့် အင်းစိန်မြို့နယ်၊ ရွာမအရှေ့ရပ်ကွက်နေ ဦးကျော်ဝင်း(၇၆)နှစ်အား ယာဉ်၏ ဝဲဘက်နောက်ဘီးနှင့် ကြိတ်မိခဲ့သဖြင့် ဦးကျော်ဝင်းတွင် ထိခိုက်ဒဏ်ရာများရရှိကာ အခင်းဖြစ်နေရာ၌ သေဆုံးသွားခဲ့သောကြောင့် တင်မျိုးအောင် အား အင်းစိန်မြို့မရဲစခန်း ယာဉ်(ပ)၁၉/၂၀၂၆၊ ရာဇသတ်ကြီးပုဒ်မ ၃၀၄-က/၂၇၉ ဖြင့် အမှုဖွင့်အရေးယူထားကြောင်း သတင်းရရှိပါသည်။