ဆီဆိုင်မြို့နယ်၊ ထီဗွာကျေးရွာမှ ဒေသခံပြည်သူ ၉ ဦးကို လုံခြုံရေးတပ်ဖွဲ့ဝင်များက လူသားဒိုင်းအဖြစ် ဖမ်းဆီးထားကြောင်း အထင်အမြင်လွဲမှားစေမည့် သတင်းတု၊ သတင်းအမှားများကို လှုံ့ဆော်ရေးသားဝါဒဖြန့်ဝေလျက်ရှိ

ဆီဆိုင်မြို့နယ်၊ ထီဗွာကျေးရွာမှ ဒေသခံပြည်သူ ၉ ဦးကို လုံခြုံရေးတပ်ဖွဲ့ဝင်များက လူသားဒိုင်းအဖြစ် ဖမ်းဆီးထားကြောင်း အထင်အမြင်လွဲမှားစေမည့် သတင်းတု၊ သတင်းအမှားများကို လှုံ့ဆော်ရေးသားဝါဒဖြန့်ဝေလျက်ရှိ

နေပြည်တော် မေ ၇

ရှမ်းပြည်နယ်တောင်ပိုင်း၊ ဆီဆိုင်မြို့နယ်၊ ထီဗွာကျေးရွာမှ ကိုယ်ဝန်သည်အမျိုးသမီး ၁ ဦးအပါအဝင် ဒေသခံပြည်သူ ၉ ဦးကို လူသားဒိုင်းအဖြစ် လုံခြုံရေးတပ်ဖွဲ့ဝင်များက ဧပြီလ ၆ ရက်နေ့တွင် ဖမ်းဆီးထားပြီး ယနေ့အချိန်ထိ ပြန်လည်လွတ်မြောက်ခြင်း မရှိသေးကြောင်း သတင်းတု၊ သတင်းအမှားများကို တရားမဝင်ပြည်ဖျက် မီဒီယာများက အထင်အမြင်လွဲမှားဖွယ် လှုံ့ဆော်ရေးသားဝါဒဖြန့်ဝေနေသည်ကို တွေ့ရှိရပါသည်။

အဆိုပါသတင်းနှင့်ပတ်သက်၍ မှန်ကန်မှုမရှိဘဲ တရားမဝင်ပြည်ဖျက်မီဒီယာများက လုံခြုံရေးတပ်ဖွဲ့ဝင်များအပေါ် ပြည်သူများအထင်အမြင်လွဲမှားစေရန်နှင့် ဂုဏ်သိက္ခာကျဆင်းစေရန်အတွက် လုပ်ကြံရေးထားခြင်းသာဖြစ်ပြီး ထီဗွာကျေးရွာမှ ဒေသခံပြည်သူများကို ဖမ်းဆီးထားခြင်းမရှိကြောင်း လုံခြုံရေးတာဝန်ရှိသူတစ်ဦး၏ ပြောကြားချက်အရ သိရှိရပါသည်။

အလားတူ တောင်ကြီးမြို့နယ်၊ ဇလဲကျေးရွာအုပ်စုရှိ ကျေးရွာများမှ စစ်မှုထမ်းရန်အတွက် တစ်ရွာလျှင် လူ ၃ ဦး စာရင်းပေးသွင်းရန်နှင့် လူမပေးနိုင်ပါက ငွေကျပ်သိန်း ၈၀ ပေးဆောင်ရမည်ဟု သတင်းအမှားများကို တရားမဝင်ပြည်ဖျက်မီဒီယာများက မဟုတ်မမှန် လုပ်ကြံရေးသားဖြန့်ဝေလျက်ရှိပါသည်။

PNLO ၊ KNDF ၊ PDF အမည်ခံအကြမ်းဖက်သောင်းကျန်းသူများသည် ဒေသကောင်းစားရေးဟုသုံးနှုန်း၍ ဟိုးပုံးမြို့နယ်နှင့် ဆီဆိုင်မြို့နယ်များအတွင်း တည်ငြိမ်အေးချမ်းမှု ပျက်ပြားစေရန်နှင့် ဒေသခံတိုင်းရင်းသားများ၏ လူမှုစီးပွားဘဝများ ပျက်စီးဆုံးရှုံးစေရန်ရည်ရွယ်၍ အဖျက်အမှောင့်လုပ်ရပ်များကိုသာ စဉ်ဆက်မပြတ်လုပ်ဆောင်လျက်ရှိပါသည်။ ၎င်းတို့၏လုပ်ရပ်များကို လုံးဝလက်ခံနိုင်မှုမရှိသည့် ဒေသခံတိုင်းရင်းသား ပြည်သူများက ကန့်ကွက်ရှုတ်ချလျက်ရှိသည့်အတွက် တရားမဝင်ပြည်ဖျက် မီဒီယာများမှတစ်ဆင့် လုံခြုံရေးတပ်ဖွဲ့ဝင်များအပေါ် မဟုတ်မမှန်စွပ်စွဲကာ သတင်းအမှားများကို ဝါဒဖြန့်ရေးသားနေခြင်းသာဖြစ်ကြောင်း သတင်းရရှိပါသည်။