စက်မှုဝန်ကြီးဌာန

ဌာနအဖွဲ့အစည်း၏အကြောင်းအရာ

သမိုင်းကြောင်း

မြန်မာနိုင်ငံကို လယ်ယာစိုက်ပျိုးရေးနိုင်ငံဘဝမှ လယ်ယာကိုအခြေခံသော စက်မှုလက်မှု နိုင်ငံအဖြစ်သို့လည်းကောင်း ထိုမှတစ်ဆင့် စက်မှုနိုင်ငံအဖြစ်သို့ ကူးပြောင်းရေးကို ရှေးရှု၍ စားဝတ်နေရေးဆိုင်ရာ၊ စက်နှင့်စက်အရန်ပစ္စည်းဆိုင်ရာ စက်ရုံကြီးငယ်များစွာကို တည်ထောင်ခဲ့ပြီး၊ စက်မှုလက်မှုကဏ္ဍတွင် စားသောက်ကုန်၊ ဝတ်ဆင်ကုန်၊ လူသုံးကုန် ထုတ်လုပ်ရေးဆိုင်ရာ စက်ရုံကြီးငယ်များသည် ပြည်သူပိုင်၊ သမဝါယမပိုင်နှင့် ပုဂ္ဂလိကပိုင်ဟူ၍ သုံးမျိုးသုံးစားရှိခဲ့ပါသည်။

မြန်မာနိုင်ငံလွတ်လပ်ရေးရရှိပြီးအချိန်တွင် စက်မှုလက်မှုလုပ်ငန်းများကို ကြီးကြပ်ကွပ်ကဲရန် ဝန်ကြီးဌာနတစ်ခုအနေဖြင့် ၁၉၅၂ ခုနှစ်အထိ သီးခြားဖွဲ့စည်းထားခြင်းမရှိဘဲ အခြားကဏ္ဍများနှင့်ပူးတွဲ၍ စက်မှုလက်မှုနှင့်ကူးသန်းရောင်းဝယ်ရေးဝန်ကြီးဌာန၊ စက်မှုလက်မှုနှင့်အလုပ်သမားဝန်ကြီးဌာန၊ စက်မှုလက်မှုနှင့်သတ္တုတွင်းဝန်ကြီးဌာန စသည်ဖြင့် အဆင့်ဆင့် ပြောင်းလဲဖွဲ့စည်းခဲ့ပြီး၊ မြန်မာနိုင်ငံ၏ ဖွဲ့စည်းအုပ်ချုပ်ပုံအခြေခံဥပဒေပါ ပြဋ္ဌာန်းချက်များအရ စက်မှုလက်မှုလုပ်ငန်းများကို တိုးချဲ့ဆောင်ရွက်သွားနိုင်ရေးအတွက် ၁၉၅၂ ခုနှစ်တွင် စက်မှုလက်မှုဝန်ကြီးဌာနကို ဌာနခွဲ၊ ဘုတ်အဖွဲ့နှင့် ကော်ပိုရေးရှင်း (၈)ခု တို့ဖြင့် သီးခြားဝန်ကြီးဌာနအဖြစ် စတင်ဖွဲ့စည်းခဲ့ပါသည်။

၁၉၇၂ ခုနှစ်တွင် တော်လှန်ရေးကောင်စီမှ စတင်အကောင်အထည်ဖော်ခဲ့သော အုပ်ချုပ်ရေးစနစ်သစ်အရ ၁၉၇၂ ခုနှစ် မတ်လ(၁၆)ရက်နေ့စွဲပါ အမိန့်ကြော်ငြာစာအမှတ်(၁)ဖြင့် စက်မှုလက်မှုဝန်ကြီးဌာန၏အမည်ကို စက်မှုဝန်ကြီးဌာနဟု ပြောင်းလဲခဲ့ပြီး ကော်ပိုရေးရှင်း (၁၆) ခုဖြင့်လည်းကောင်း၊ ၁၉၇၅ ခုနှစ်တွင် ပြည်ထောင်စုဆိုရှယ်လစ်သမ္မတမြန်မာနိုင်ငံတော်အစိုးရအဖွဲ့သည် စက်မှုလက်မှုကဏ္ဍဆိုင်ရာ လုပ်ငန်းအရပ်ရပ်ကို ပိုမိုထိရောက်အောင်မြင်စွာ ဆောင်ရွက်နိုင်ရန်အလို့ငှာ ၁၉၇၅ ခုနှစ် မတ်လ(၂၉)ရက်နေ့စွဲပါ အမိန့်ကြော်ငြာစာအမှတ်(၃)ဖြင့် ၁၉၇၅ ခုနှစ် ဧပြီလ(၁)ရက်နေ့မှစတင်၍ စက်မှုဝန်ကြီးဌာနကို အမှတ်(၁)စက်မှုဝန်ကြီးဌာနနှင့် အမှတ်(၂) စက်မှုဝန်ကြီးဌာနဟူ၍ ပြင်ဆင်ဖွဲ့စည်းခဲ့ပါသည်။

ပြည်ထောင်စုသမ္မတမြန်မာနိုင်ငံတော်၊ နိုင်ငံတော်သမ္မတရုံး၏ ၂.၁၂.၂၀၁၁ ရက်စွဲပါ အမိန့်ကြော်ငြာစာအမှတ်၊ ၉၅/၂၀၁၁ အရ အမှတ် (၁) စက်မှုဝန်ကြီးဌာနနှင့် အမှတ် (၂) စက်မှုဝန်ကြီးဌာနတို့အား စက်မှုဝန်ကြီးဌာနအဖြစ် ပြင်ဆင်ဖွဲ့၍ ပြည်ထောင်စုဝန်ကြီးရုံး၊ ဦးစီးဌာန(၃) ခု၊ စက်မှုလုပ်ငန်း (၆) ခုနှင့် ဗဟိုဌာန (၂) ခု၊ စုစုပေါင်းဌာန (၁၂) ခု ဖြင့် အောက်ပါအတိုင်း ဖွဲ့စည်းခဲ့ပါသည် -
(က) ပြည်ထောင်စုဝန်ကြီးရုံး
(ခ) စက်မှုညွှန်ကြားရေးဦးစီးဌာန
(ဂ) စက်မှုစီမံကိန်းဦးစီးဌာန
(ဃ) စက်မှုကြီးကြပ်ရေးနှင့်စစ်ဆေးရေးဦးစီးဌာန
(င) အမှတ်(၁)အကြီးစားစက်မှုလုပ်ငန်း
(စ) အမှတ်(၂)အကြီးစားစက်မှုလုပ်ငန်း
(ဆ) အမှတ်(၃)အကြီးစားစက်မှုလုပ်ငန်း
(ဇ) အထည်အလိပ်လုပ်ငန်း
(ဈ) ဆေးဝါးနှင့်စားသောက်ကုန်လုပ်ငန်း
(ည) စက္ကူနှင့်အိမ်သုံးပစ္စည်းလုပ်ငန်း
(ဋ) သုတေသနနှင့်ဖွံ့ဖြိုးရေးဗဟိုဌာန
(ဌ) အသေးစားနှင့်အလတ်စားလုပ်ငန်းများဖွံ့ဖြိုးတိုးတက်ရေးဗဟိုဌာန

စက်မှုဝန်ကြီးဌာနတွင် လုပ်ငန်းသဘာဝတူညီမှုရှိသော ဦးစီးဌာနများပါဝင်နေခြင်း၊ ပုဂ္ဂလိကစက်မှုကဏ္ဍနှင့် အသေးစားနှင့်အလတ်စားစက်မှုလုပ်ငန်းများဖွံ့ဖြိုးတိုးတက်ရေးအတွက် အချို့ဌာနများ၏ ဖွဲ့စည်းပုံအား တိုးချဲ့ဆောင်ရွက်ရန်လိုအပ်ခြင်း၊ စက်ရုံ/ အလုပ်ရုံများအား ပုဂ္ဂလိကသို့ ငှားရမ်းခြင်း၊ အကျိုးတူ/ဖက်စပ် ဆောင်ရွက်ခြင်းများ ပြုလုပ်ခဲ့သဖြင့် ဖွဲ့စည်းပုံ ပြန်လည်အပ်နှံရန် လိုအပ်ခြင်းတို့ကြောင့် ပြည်ထောင်စုအစိုးရအဖွဲ့ အစည်းအဝေးအမှတ်စဉ် (၃/၂၀၁၄) မှ သဘောတူခွင့်ပြုချက်အရ ၁.၄.၂၀၁၄ ရက် နေ့မှစ၍ ပြည်ထောင်စုဝန်ကြီးရုံး၊ ဦးစီးဌာန (၂)ခု၊ စက်မှုလုပ်ငန်း (၆) ခုနှင့် ဗဟိုဌာန(၁) ခု၊ စုစုပေါင်းဌာန(၁၀)ခု တို့ဖြင့် အောက်ပါအတိုင်း ပြင်ဆင်ဖွဲ့စည်းခဲ့ပါသည်-
(က) ပြည်ထောင်စုဝန်ကြီးရုံး
(ခ) စက်မှုညွှန်ကြားရေးဦးစီးဌာန
(ဂ) စက်မှုကြီးကြပ်ရေးနှင့်စစ်ဆေးရေးဦးစီးဌာန
(ဃ) အမှတ်(၁)အကြီးစားစက်မှုလုပ်ငန်း
(င) အမှတ်(၂)အကြီးစားစက်မှုလုပ်ငန်း
(စ) အမှတ်(၃)အကြီးစားစက်မှုလုပ်ငန်း
(ဆ) အထည်အလိပ်လုပ်ငန်း
(ဇ) ဆေးဝါးနှင့်စားသောက်ကုန်လုပ်ငန်း
(ဈ) စက္ကူနှင့်အိမ်သုံးပစ္စည်းလုပ်ငန်း
(ည) သုတေသနနှင့်ဖွံ့ဖြိုးရေးဗဟိုဌာန

နိုင်ငံတော်အစိုးရအနေဖြင့် ဆောင်ရွက်လျက်ရှိသော အစိုးရအုပ်ချုပ်ရေးယန္တရား တိုးတက်ကောင်းမွန်ရေး ပြုပြင်ပြောင်းလဲမှု လုပ်ငန်းစဉ်အရ ဖွဲ့စည်းပုံများကို ခေတ်နှင့်အညီ တိုးတက်ကောင်းမွန်အောင် ပြုပြင်ပြောင်းလဲရန်အတွက် ဖွဲ့စည်းပုံအင်အားကို ကျစ်လစ်မှုရှိစေရန် လိုအပ်ခြင်းကြောင့် ဝန်ကြီးရုံးအား တိုးချဲ့ပြင်ဆင်ဖွဲ့စည်းခြင်း၊ ဦးစီးဌာနအချို့အား လိုအပ်ချက်အရ အမည်ပြောင်းလဲ၍ ပြင်ဆင်လျှော့ချဖွဲ့စည်းခြင်း၊ စက်မှုလုပ်ငန်းများကို ပူးပေါင်းဖွဲ့စည်းခြင်း၊ ဗဟိုဌာနကို ဖျက်သိမ်းခြင်းများ ဆောင်ရွက်ခဲ့ပါသည်။

အထက်ပါအချက်များနှင့်အညီ ပြင်ဆင်ဖွဲ့စည်းခဲ့သည့် စက်မှုဝန်ကြီးဌာန၏ ဖွဲ့စည်းပုံကို ၂၅.၃.၂၀၁၅ ရက်နေ့တွင် ကျင်းပပြုလုပ်သော ပြည်ထောင်စုအစိုးရအဖွဲ့အစည်းအဝေး အမှတ်စဉ် (၇/၂၀၁၅) မှ သဘောတူခွင့်ပြုချက်အရ ၁.၄.၂၀၁၅ ရက်နေ့မှစ၍ ဝန်ကြီးရုံး၊ ဦးစီးဌာန (၂) ခုနှင့် စက်မှုလုပ်ငန်း(၄) ခု၊ စုစုပေါင်း (၇) ခု တို့ဖြင့် အောက်ပါအတိုင်း ပြင်ဆင်ဖွဲ့စည်းခဲ့ပါသည်-
(က) ပြည်ထောင်စုဝန်ကြီးရုံး
(ခ) စက်မှုပူးပေါင်းဆောင်ရွက်ရေးဦးစီးဌာန
(ဂ) စက်မှုကြီးကြပ်ရေးနှင့်စစ်ဆေးရေးဦးစီးဌာန
(ဃ) အမှတ်(၁)အကြီးစားစက်မှုလုပ်ငန်း
(င) အမှတ်(၂)အကြီးစားစက်မှုလုပ်ငန်း
(စ) အမှတ်(၃)အကြီးစားစက်မှုလုပ်ငန်း
(ဆ) မြန်မာ့ဆေးဝါးလုပ်ငန်း

အဆိုပါဖွဲ့စည်းပုံတွင် အမှတ်(၁)အကြီးစားစက်မှုလုပ်ငန်းရှိ အမှတ်(၁၈) အကြီးစားစက်ရုံ(အင်းကုန်း)အား လယ်ယာစိုက်ပျိုးရေးနှင့်ဆည်မြောင်းဝန်ကြီးဌာနသို့ လွှဲပြောင်းပေးအပ်ခဲ့ပါသည်။

ထို့နောက် အမှတ်(၁၁)အကြီးစားစက်ရုံ(ရန်ကုန်)၊အမှတ်(၁၂)အကြီးစားစက်ရုံ(ထုံးဘို)၊ အမှတ်(၁၃)အကြီးစားစက်ရုံ(မကွေး)၊ အမှတ်(၂၅)အကြီးစားစက်ရုံ(မြိုင်)တို့ကို ၁၃.၁.၂၀၁၆ ကျင်းပပြုလုပ်သော ပြည်ထောင်စုအစိုးရအဖွဲ့ အစည်းအဝေးအမှတ်စဉ် (၂/၂၀၁၆)မှ သဘောတူ ခွင့်ပြုချက်အရ ကာကွယ်ရေးဝန်ကြီးဌာနသို့ လွှဲပြောင်းပေးခဲ့ပြီး ၁၀.၁၁.၂၀၁၆ ရက်နေ့တွင် ပြုလုပ်သော ပြည်ထောင်စုအစိုးရ အဖွဲ့အစည်းအဝေးအမှတ်စဉ် (၁၅/၂၀၁၆)မှ သဘောတူခွင့်ပြုချက်ဖြင့် စက်မှုဝန်ကြီးဌာန၏ဖွဲ့စည်းပုံအင်အားကို ပြင်ဆင်ဖွဲ့စည်းခဲ့ပါသည်။

နိုင်ငံတော်သမ္မတရုံး၏ ၂၈.၁၁.၂၀၁၉ ရက်စွဲပါ အမိန့်ကြော်ငြာစာအမှတ်၊ ၁၂၃/၂၀၁၉ အရ စက်မှုဝန်ကြီးဌာနနှင့် စီမံကိန်းနှင့် ဘဏ္ဍာရေးဝန်ကြီးဌာနတို့ကို စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနအဖြစ် ပြင်ဆင်ဖွဲ့စည်းခဲ့ပါသည်။ အမှတ်(၇)စက်မှုသင်တန်းကျောင်း(သထုံ)နှင့် အမှတ်(၈)စက်မှုသင်တန်းကျောင်း(မုံရွာ)တို့အား တိုးချဲ့ဖွဲ့စည်းခဲ့မှုအရ စက်မှုကဏ္ဍ၏ ဖွဲ့စည်းပုံခွင့်ပြုအင်အားကို ပြင်ဆင်ဆောင်ရွက်ခဲ့ပါသည်။

နိုင်ငံတော်စီမံအုပ်ချုပ်ရေးကောင်စီသည် ဖွဲ့စည်းပုံအခြေခံဥပဒေ ပုဒ်မ ၄၁၉ အရ ၃.၅.၂၀၂၁ ရက်စွဲပါ အမိန့်အမှတ်၊ ၁၁၇/ ၂၀၂၁ ဖြင့် စီမံကိန်း၊ ဘဏ္ဍာရေးနှင့် စက်မှုဝန်ကြီးဌာနအား စီမံကိန်းနှင့် ဘဏ္ဍာရေးဝန်ကြီးဌာနနှင့် စက်မှုဝန်ကြီးဌာနအဖြစ် ပြင်ဆင်ဖွဲ့စည်းခဲ့ပါသည်။

မျှော်မှန်းချက်

ခေတ်မီစက်မှုနိုင်ငံထူထောင်ရန်

ရည်မှန်းချက်

စက်မှုကဏ္ဍဖွံ့ဖြိုးတိုးတက်ရေးအတွက် နိုင်ငံတော်မှ ဆက်လက်ဆောင်ရွက်သင့်သည့် နိုင်ငံပိုင် စက်ရုံ၊ အလုပ်ရုံများ အောင်မြင်မှုရရှိစေရန်၊ ပုဂ္ဂလိကစက်မှုကဏ္ဍဖွံ့ဖြိုးတိုးတက်ရေးအတွက် နိုင်ငံပိုင်စက်ရုံ၊ အလုပ်ရုံများကို ပုဂ္ဂလိကပူးပေါင်းဆောင်ရွက်မှုအား တိုးမြှင့်ဆောင်ရွက်ရန်၊
လုပ်သားအခြေပြုစက်မှုလုပ်ငန်းများနှင့် စိုက်ပျိုးရေး၊ မွေးမြူရေး အခြေခံတန်ဖိုးမြှင့်ထုတ်ကုန်များထုတ်လုပ်ခြင်းကို အားပေးဆောင်ရွက်ပြီး ပြည်တွင်းဈေးကွက် ချဲ့ထွင်နိုင်ခြင်းမှ တစ်ဆင့် ပို့ကုန်ဦးစားပေး စက်မှုလုပ်ငန်းများ ဖြစ်ပေါ်လာစေရန်၊
စက်မှုဇုန်များ၊ ပုဂ္ဂလိကစက်မှုလုပ်ငန်းများ၊ အသေးစား၊ အငယ်စားနှင့် အလတ်စား စီးပွားရေးလုပ်ငန်းများ စနစ်တကျဖွံ့ဖြိုးတိုးတက်လာပြီး ပြည်သူလူထု၏ လူမှုစီးပွားဘဝ တိုးတက်မြင့်မားလာစေရန်၊
Medium-Tech and High-Tech ကဏ္ဍများတွင် ရင်းနှီးမြှုပ်နှံမှုများ ပိုမိုဝင်ရောက်လာစေရေး အားပေးဆောင်ရွက်ခြင်းဖြင့် နည်းပညာနှင့် ဈေးကွက်ရရှိနိုင်ပြီး ပြည်ပပို့ကုန်နှင့် သွင်းကုန် အစားထိုးစက်မှုလုပ်ငန်းများ ဖြစ်ပေါ်လာနိုင်စေရန်။

မူဝါဒ

စိုက်ပျိုးရေး၊ မွေးမြူရေးနှင့် စက်မှုကဏ္ဍများ ဘက်ညီဖွံ့ဖြိုးရေးအတွက် လယ်ယာအခြေခံ စက်မှုလုပ်ငန်းများ၊ လယ်ယာထုတ်ကုန်များ တန်ဘိုးမြှင့်ထုတ်လုပ်သည့် လုပ်ငန်းများနှင့် စားသောက်ကုန်ထုတ်လုပ်ငန်းများ ကျယ်ကျယ်ပြန့်ပြန့်တိုးတက်လာစေရေး၊ အသေးစား၊ အငယ်စားနှင့် အလတ်စားစီးပွားရေးလုပ်ငန်းများအား အထူးအလေးထား အားပေးမြှင့်တင်ပေးခြင်း၊ အကြီးစားစက်မှုလုပ်ငန်းကြီးများကို တည်ထောင်ခြင်းတို့ဖြင့် သွင်းကုန်အစားထိုး ထုတ်ကုန်နှင့် ပြည်ပပို့ထုတ်ကုန်များ တိုးမြင့်လာစေရေး၊
စက်မှုကဏ္ဍဖွံ့ဖြိုးတိုးတက်လာစေရေးအတွက် နိုင်ငံပိုင်စက်ရုံ၊ အလုပ်ရုံများ အောင်မြင်မှု ရရှိစေရေးနှင့် ပုဂ္ဂလိကအခန်းကဏ္ဍ၊ အစိုးရနှင့်ပုဂ္ဂလိက ပူးပေါင်းဆောင်ရွက်မှုကဏ္ဍများ ပိုမို မြှင့်တင်ရေးအတွက် နည်းပညာ၊ အတတ်ပညာနှင့် ရင်းနှီးမြှုပ်နှံမှုများဖိတ်ခေါ်၍ ပူးပေါင်း ဆောင်ရွက်ရေး၊
စက်မှုထုတ်ကုန်များ အရည်အသွေးတိုးတက်မြင့်မားလာစေရန်နှင့် ဆန်းသစ်တီထွင်နိုင်ရန် အတွက်သုတေသနနှင့်ဖွံ့ဖြိုးမှုလုပ်ငန်းများတိုးမြှင့်ဆောင်ရွက်ရေးနှင့် “စက်မှုနှင့်ဝန်ဆောင်မှု” လူ့စွမ်းအားအရင်းအမြစ်ဖွံ့ဖြိုးတိုးတက်ရေး၊
ပြည်တွင်းရှိ သယံဇာတကုန်ကြမ်းပစ္စည်းများကို ထိရောက်အကျိုးရှိစွာအသုံးပြုပြီး တန်ဘိုးမြှင့် ထုတ်လုပ်ခြင်းအား တိုးမြှင့်ဆောင်ရွက်ရေး၊ သဘာဝပတ်ဝန်းကျင်ကို ထိခိုက်မှုလျော့နည်းစေသည့် စက်မှုလုပ်ငန်းများဖြစ်စေရေး၊ ပြန်ပြည့်မြဲစွမ်းအင်များ အသုံးပြုနိုင်ရေးနှင့် စွမ်းအင်ကို အကျိုးရှိထိရောက်စွာအသုံးချနိုင်ရေး၊
လျှပ်စစ်စွမ်းအင်သုံး မော်တော်ယာဉ်ထုတ်လုပ်မှုနှင့် ဆက်စပ်စက်မှုလုပ်ငန်းများ ဖွံ့ဖြိုးတိုးတက်လာစေရေး၊ ဖန်လုံအိမ်ဓာတ်ငွေ့ထုတ်လွှတ်မှုကင်းစင်သော သယ်ယူပို့ဆောင်ရေးစနစ်ကို တည်ထောင်ရာတွင် ပင်မအထောက်အကူဖြစ်စေရေး မူဝါဒချမှတ်ဆောင်ရွက်ရေး၊
စက်မှုလုပ်ငန်းများအတွက် လိုအပ်သော သွင်းအားစုများဖြစ်သည့် လျှပ်စစ်ဓာတ်အား၊ ရေနံ၊ သဘာဝဓာတ်ငွေ့စသည်တို့ လုံလောက်စွာရရှိစေရေးအတွက် ပံ့ပိုးညှိနှိုင်းဆောင်ရွက်ပေးရန်နှင့် စက်မှုလုပ်ငန်းများ ဖွံ့ဖြိုးတိုးတက်ရေးအတွက် ပြည်တွင်းရှိ စက်မှုဇုန်များကို စနစ်တကျ စီမံခန့် ခွဲရေး၊ ကာကွယ်မှုအစီအမံများ ချမှတ်နိုင်ရေး၊
နိုင်ငံတကာ၊ ဒေသတွင်းနှင့် နိုင်ငံအတွင်း ပူးပေါင်းဆောင်ရွက်မှုတို့တွင် တန်းတူပါဝင်နိုင်စေခြင်းဖြင့် နည်းပညာနှင့် အထောက်အပံ့များ စုပေါင်းအင်အားစုများမှ ပြည်တွင်းစက်မှုကဏ္ဍ၏ အရည်အသွေးကို မြှင့်တင်နိုင်ရေး၊
ပုဂ္ဂလိကစက်မှုလုပ်ငန်းများ၊ စက်မှုဇုန်များ၊ စက်မှုလုပ်ငန်းနှင့် ဆက်နွယ်သည့်လုပ်ငန်းများ စနစ်တကျ ဖွံ့ဖြိုးတိုးတက်လာခြင်းဖြင့် နိုင်ငံတော်၏ စက်မှုကဏ္ဍဆိုင်ရာ GDP တိုးတက်စေရန်နှင့် ဘေးအန္တရာယ်ကင်းရှင်း၍ ရေရှည်တည်တံ့သောစက်မှုလုပ်ငန်းများ ဖြစ်လာစေရေး၊
လူငယ်နှင့် အမျိုးသမီးစွန့်ဦးတီထွင်လုပ်ငန်းရှင်များ၊ တီထွင်ဆန်းသစ်မှုများကို အားပေးမြှင့်တင်၍ ပြည်တွင်းထုတ်ကုန်များ တိုးတက်လာစေခြင်းနှင့် ပြည်ပပို့ကုန်အမယ်သစ်များ ပေါ်ပေါက်လာစေခြင်းဖြင့် အသေးစား၊ အငယ်စားနှင့် အလတ်စားစီးပွားရေးလုပ်ငန်းများပိုမိုဖွံဖြိုးတိုးတက် လာစေရေး။

လုပ်ငန်းစဉ်များ

နိုင်ငံပိုင်စက်မှုလုပ်ငန်းများအား ဈေးကွက်စီးပွားရေးစနစ်နှင့်အညီ ထုတ်ကုန်များ အရည်အသွေး ကောင်းမွန်စေရေးနှင့် ဈေးကွက်လိုအပ်ချက်နှင့် ကိုက်ညီစေရန် သုတေသနပြုလုပ်ခြင်း၊ ဆန်းသစ်တီထွင်ထုတ်လုပ်ခြင်း၊ အရောင်းမြှင့်တင်ရေးအစီအစဉ်များ ပြုလုပ်ခြင်းတို့ဖြင့် အောင်မြင် မှုရရှိစေရန် ဆောင်ရွက်မည်၊
အစိုးရနှင့် ပုဂ္ဂလိကပူးပေါင်းဆောင်ရွက်ရာတွင် ခန့်အပ်ပြီး နိုင်ငံ့ဝန်ထမ်းများအား စီမံခန့်ခွဲမှုဆိုင်ရာ မူဘောင်တစ်ရပ် ပေါ်ထွက်လာရေးဆောင်ရွက်ခြင်း၊ ပုဂ္ဂလိကနှင့် လက်ရှိပူးပေါင်း ဆောင်ရွက်လျက်ရှိသည့် စက်ရုံ၊ အလုပ်ရုံများအား မူလစာချုပ်ပါ စည်းကမ်းချက်များနှင့်အညီ ဆောင်ရွက်မှုရှိ/မရှိ စိစစ်သုံးသပ်၍ စဉ်ဆက်မပြတ် ကြီးကြပ်ဆောင်ရွက်ခြင်း၊ ကျန်ရှိသည့် စက်ရုံအလုပ်ရုံများအား ပုဂ္ဂလိကပူးပေါင်း၍ ရင်းနှီးမြှုပ်နှံမှုများတိုးမြှင့်ခြင်း၊ နည်းပညာသစ်များ ထပ်တိုးခြင်းတို့ဖြင့် စက်မှုကဏ္ဍဖွံ့ဖြိုးတိုးတက်ရေး ဆောင်ရွက်မည်၊
အသေးစား၊ အငယ်စားနှင့် အလတ်စားစီးပွားရေး လုပ်ငန်းများအတွက် လိုအပ်သည့် ဈေးကွက်၊ နည်းပညာနှင့် ငွေကြေးအရင်းအနှီးများကို နိုင်ငံတော်နှင့် နိုင်ငံတကာအဖွဲ့အစည်းများထံမှ အကူအညီအထောက်အပံ့ရရှိနိုင်ရန်နှင့် လုပ်ငန်းများရေရှည်ဖွံ့ဖြိုးတိုးတက်ရေးအတွက် ဆောင် ရွက်သွားမည်၊
နိုင်ငံတော်နှင့် ပုဂ္ဂလိကအခန်းကဏ္ဍတွင် လိုအပ်လျက်ရှိသော ဈေးကွက်လိုအပ်ချက်နှင့် ကိုက်ညီသည့် ကျွမ်းကျင်လုပ်သားများ ဖြည့်ဆည်းပေးနိုင်ရေးအတွက် သင်တန်းကျောင်းများတွင် ပုံမှန်သင်တန်းများ ဖွင့်လှစ်ခြင်း၊ စက်မှုနှင့် အသက်မွေးပညာရွေ့လျား ရက်တိုသင်တန်းများနှင့် ကျွမ်းကျင်မှုအခြေပြု ကာလတို(၃)လ သင်တန်းများ ဖွင့်လှစ်ခြင်းတို့ကို ဆောင်ရွက်သွားမည်၊
သင်တန်းကျောင်းများမှ အရည်အသွေးပြည့်ဝသော ကျွမ်းကျင်လုပ်သားများ မွေးထုတ်ပေးနိုင်ရန် လေ့ကျင့်သင်ကြားပေးနေသော နည်းပြများ၏ စွမ်းဆောင်ရည် မြှင့်တင်ရေးအတွက် နည်းပြ လေ့ကျင့်မွမ်းမံရေးသင်တန်းများသို့ စေလွှတ်ခြင်း၊ သင်ရိုးညွှန်းတမ်းများ ပြုပြင်ပြောင်းလဲခြင်း နှင့် ဘာသာရပ်နှင့်ကိုက်ညီသော သင်တန်းများ တိုးချဲ့ဖွင့်လှစ်ခြင်းများ ဆောင်ရွက်သွားမည်၊
အရည်အသွေးအာမခံမှုရှိစေရန် သင်တန်းဆင်းများ ကျွမ်းကျင်မှုစစ်ဆေးခံနိုင်စေရန်နှင့် ကျွမ်းကျင်မှု အသိအမှတ်ပြုလက်မှတ် ရရှိနိုင်ရေးတို့အတွက် သင်တန်းကျောင်းများတွင် သက်ဆိုင်ရာအလုပ်အကိုင်အလိုက် မြန်မာနိုင်ငံကျွမ်းကျင်မှု “စံ”သတ်မှတ်ပြဋ္ဌာန်းရေးအဖွဲ့ NSSA အသိအမှတ်ပြု စစ်ဆေးအကဲဖြတ်ရေးဌာန (Assessment Center)များအဖြစ် ရရှိရေးအတွက် ဆောင်ရွက်သွားမည်၊
စွမ်းအင်ကို အကျိုးရှိထိရောက်စွာသုံးစွဲရေးနှင့် ထိန်းသိမ်းရေးဆိုင်ရာ အမျိုးသားအဆင့် ဥပဒေ မူဘောင်များထွက်ပေါ်လာရေးနှင့် ကဏ္ဍစုံလိုအပ်သည့် အစီအမံများနှင့် ပြန်လည်ပြည့်ဖြိုးမြဲ စွမ်းအင်များ အသုံးချနိုင်ရေးအပါအဝင် ဆက်စပ်လုပ်ငန်းများအား ချမှတ်အကောင်အထည်ဖော်နိုင်ရေးတို့ကို ဆောင်ရွက်မည်၊
ဓာတုပစ္စည်း သွင်းကုန်၊ ထုတ်ကုန်များကို နိုင်ငံတကာအသိအမှတ်ပြုအရည်အသွေး ထောက်ခံချက်များ အချိန်မီထုတ်ပေးနိုင်ရေးအတွက် မူလဓာတ်ခွဲခန်း တည်ဆောက်ခြင်းနှင့် ဓာတုစွန့်ပစ်ပစ္စည်းများကြောင့် လူသားများ၏ ကျန်းမာရေးနှင့် ဂေဟစနစ်များအား ထိခိုက်ခြင်းမှ ကာကွယ်မည့် အစီအမံများချမှတ်ခြင်းတို့ကို အကောင်အထည်ဖော်ဆောင်ရွက်မည်၊
ဝန်ကြီးဌာနမှ ပြဋ္ဌာန်းထားရှိပြီးဖြစ်သည့် ဥပဒေများ၊ နည်းဥပဒေများ၊ မူဝါဒများ၊ လုပ်ထုံးလုပ်နည်းများနှင့်အညီ စက်မှုကဏ္ဍဆိုင်ရာလုပ်ငန်းများ အန္တရာယ်ကင်းရှင်းစွာ ဆောင်ရွက်နိုင်ရေးနှင့် စက်မှုကဏ္ဍဆိုင်ရာ စာရင်းဇယားများ ရရှိနိုင်ရေးအတွက် ကြီးကြပ်စစ်ဆေးခြင်း၊ မှတ်ပုံတင်ပေးခြင်း၊ အားပေးမြှင့်တင်ခြင်းများ ဆောင်ရွက်မည်၊
ရပ်နားထားသော နိုင်ငံပိုင် စက်ရုံများကို ပြန်လည် လည်ပတ်နိုင်ရေးအတွက် နည်းပညာ၊ ငွေကြေးရင်းနှီးမြှုပ်နှံမှု၊ ဈေးကွက်လိုအပ်ချက်နှင့် ကုန်ထုတ်သွင်း အားစုများရရှိနိုင်မှု အခြေအနေ၊ စီးပွားရေးတွက်ခြေကိုက်မှုအခြေအနေများပေါ်တွင် စိစစ်သုံးသပ်ခြင်းများဖြင့် ဆောင်ရွက်နိုင်မည့် နည်းလမ်းများကို ဖော်ထုတ်နိုင်ရန် ဆောင်ရွက်မည်၊
ပုဂ္ဂလိကနှင့် ပူးပေါင်းဆောင်ရွက်လျက်ရှိသော နိုင်ငံပိုင်စက်ရုံများ၏ ကုန်ထုတ်လုပ်မှုနှင့် စီးပွားဖြစ်မှု အခြေအနေများကို စိစစ်သုံးသပ်လျက် လုပ်ငန်းများရှင်သန်ရပ်တည်နိုင်ရေး လိုအပ်ချက်များကို အစိုးရနှင့် ပုဂ္ဂလိကအဖွဲ့အစည်းတို့ကြား ညှိနှိုင်း၍ ပူးပေါင်းဆောင်ရွက်မည်၊
လုပ်ငန်းရုံးချုပ်များ၊ စက်ရုံများနှင့် စက်မှုသင်တန်းကျောင်းများတွင် အရည်အချင်း ပြည့်မီသော စီမံခန့်ခွဲမှုစနစ်များ တည်ထောင်ဆောင်ရွက်နိုင်ရေး စီစဉ်ဆောင်ရွက်မည်၊
အရည်အသွေး ပြည့်ဝသော လူ့စွမ်းအားအရင်းအမြစ် ဖွံ့ဖြိုးတိုးတက်ရေးအတွက် လူ့စွမ်းအား အရင်းအမြစ်ဖွံ့ဖြိုးတိုးတက်ရေးဆိုင်ရာ စွမ်းဆောင်ရည်မြှင့်တင်ရေးအစီအစဉ်များ ချမှတ်ရေးဆွဲ ဆောင်ရွက်မည်၊
လောင်စာဆီအသုံးပြုသော မော်တော်ယာဉ်များနေရာတွင် အစားထိုးအသုံးပြုမည့် လျှပ်စစ်ဓာတ်အားသုံး မော်တော်ယာဉ်ထုတ်လုပ်သည့် စက်မှုလုပ်ငန်းများနှင့် ဆက်စပ်စက်မှုလုပ်ငန်းများ ဖွံ့ဖြိုးတိုးတက်လာစေရန်၊ ဖန်လုံအိမ်ဓာတ်ငွေ့ထုတ်လွှတ်မှုကင်းစင်သော သယ်ယူပို့ဆောင်ရေး စနစ်ကို တည်ထောင်နိုင်ရန် ဦးတည်သော မူဝါဒ၊ လုပ်ငန်းစဉ်များချမှတ်၍ သက်ဆိုင်ရာဝန်ကြီးဌာန၊ အဖွဲ့အစည်းများ၊ ပုဂ္ဂလိက ရင်းနှီးမြှုပ်နှံသူများနှင့်ပူးပေါင်း၍ အကောင်အထည်ဖော် ဆောင်ရွက်မည်၊
Corporate Governance နှင့်စပ်လျဉ်း၍ နားလည်မှုပြန့်ပွားစေရန်နှင့်လက်တွေ့အသုံးချနိုင်မှုတွင် အထောက်အကူပြုစေရန် စီစဉ်ဆောင်ရွက်မည်၊
ဝန်ကြီးဌာနမှ ပြဋ္ဌာန်းထားရှိပြီး ဖြစ်သည့် ဥပဒေများ၊ နည်းဥပဒေများ၊ မူဝါဒများ၊ လုပ်ထုံး လုပ်နည်းများနှင့်အညီ အသေးစား၊ အငယ်စားနှင့် အလတ်စားစီးပွားရေးလုပ်ငန်းများကို အားပေးမြှင့်တင်ပံ့ပိုးပေးခြင်း အစီအစဉ်များ ချမှတ်ဆောင်ရွက်မည်၊
နိုင်ငံခြားရင်းနှီးမြှုပ်နှံမှု လုပ်ငန်းများ(FDI)၊ အကြီးစားစက်မှုလုပ်ငန်းများနှင့် ပြည်တွင်းရှိ အသေးစား၊ အငယ်စားနှင့် အလတ်စားစီးပွားရေးလုပ်ငန်းများ(MSME) ချိတ်ဆက်ဆောင်ရွက် ထောက်ပံ့ပေးနိုင်မည့် စက်မှုချိတ်ဆက်မှု မြှင့်တင်ရေး လုပ်ငန်းအစီအစဉ် (Industrial Linkage Promotion Plan) တစ်ရပ်အား စက်မှုလုပ်ငန်းများ၏ ကဏ္ဍအလိုက် ရေးဆွဲဆောင်ရွက်မည်၊
လူငယ်နှင့် အမျိုးသမီးစွန့်ဦးတီထွင် လုပ်ငန်းရှင်များ၊ တီထွင်ဆန်းသစ်မှုများ အားပေးမြှင့်တင်ခြင်းဆောင်ရွက်သွားမည်၊
တည်ဆဲဥပဒေ၊ နည်းဥပဒေနှင့် လုပ်ထုံးလုပ်နည်းများအား ခေတ်စနစ်နှင့်အညီ ပြင်ဆင်နိုင်ရေး နှင့်လိုအပ်သည့် ဥပဒေ၊ နည်းဥပဒေ၊ လုပ်ထုံးလုပ်နည်း အသစ်များအား ရေးဆွဲပြဋ္ဌာန်းနိုင်ရေး ဆောင်ရွက်သွားမည်၊
တစ်မျိုးသားလုံးလိုအပ်ချက်ကို ဖြည့်ဆည်းပေးရာတွင်ဝါသီးနှံနှင့် ဝါးကုန်ကြမ်းအခြေခံ၍ ထုတ်လုပ်သော နိုင်ငံပိုင်စက်ရုံများအနေဖြင့် အဝတ်အထည်နှင့် အထည်အလိပ် ထုတ်လုပ်မှုကဏ္ဍနှင့် စက္ကူ/ပျော့ဖတ်ထုတ်လုပ်မှုကဏ္ဍများတွင် ဖွံ့ဖြိုးတိုးတက်အောင်ဆောင်ရွက်ရေးနှင့် သက်ဆိုင်ရာ ကဏ္ဍအလိုက် အသေးစား၊ အငယ်စားနှင့် အလတ်စား ပုဂ္ဂလိကလုပ်ငန်းရှင်များအား အတတ်ပညာ၊ နည်းပညာများနှင့် လိုအပ်သည်များကို ပံ့ပိုးကူညီပူးပေါင်းရေးဆောင်ရွက်မည်၊
စက်မှုကဏ္ဍ ဖွံ့ဖြိုးတိုးတက်စေမည့် စီမံကိန်းများအကောင်အထည်ဖော်ရာတွင် သက်ဆိုင်ရာ ကဏ္ဍအလိုက် အစိုးရနှင့် ပုဂ္ဂလိကပူးပေါင်းဆောင်ရွက်မည်။ (ဥပမာ- ၂/၈၀ ချည် Quick Win Project)